no_result
Şəbəkədə birdən çox cihazın bir-biri ilə stabil, sürətli və fasiləsiz əlaqə qurması üçün təkcə router kifayət etmir. Belə hallarda switch köməyə gəlir. Onun işi sadə görünə bilər: cihazları birləşdirir və məlumat axınını təmin edir. Amma əslində bu sadəliyin arxasında olduqca ağıllı idarəetmə sistemi dayanır. Switch hər bir məlumat paketini oxuyur və onu yalnız təyinat nöqtəsinə göndərir. Beləliklə, məlumat itkilərinin, çarpaz siqnalların və yüklənmənin qarşısı alınır.
Router əsasən internet bağlantısını idarə edir, switch isə lokal şəbəkənin daxilində baş verən əlaqəni. Yəni router evə və ya ofisə internet gətirir, switch isə evin və ya ofisin içindəki cihazları bir-biri ilə əlaqələndirir. İki kompüter, bir printer və bir NAS cihazı varsa – hamısı eyni routerə deyil, bir switch-ə bağlanaraq daha səmərəli işləyə bilər. Əlavə olaraq, switch internetdən asılı olmadan da işləyə bilər, çünki onun işi lokal şəbəkəni effektiv saxlamaqdır.
Əgər bir şəbəkədə birdən çox cihaz Ethernet vasitəsilə qoşulubsa və routerdə port çatışmırsa, switch mütləq lazımdır. Bu, təkcə ofis üçün deyil, ev üçün də keçərlidir. Smart TV, oyun konsolu, masaüstü kompüter və printer — hər biri kabelli bağlantı istəyirsə, 5 və ya 8 portlu sadə switch bu işi rahatlıqla görür. Daha iri şəbəkələrdə isə 16, 24, hətta 48 portlu modellər istifadə olunur. Server otaqları, IP kamera sistemləri, şirkət içi sənəd paylaşım sistemləri — bunlar artıq peşəkar səviyyədir və burada switch əsas elementə çevrilir.
Bazarda iki əsas switch növü var: idarəolunmayan və idarə olunan. Sadə ev istifadəçisi üçün idarəolunmayan (plug and play) modellər daha münasibdir. Quraşdırma tələb etmir, sadəcə qoşursan və işləyir. Amma əgər siz şəbəkə üzərində nəzarət qurmaq, trafikə prioritet vermək, VLAN yaratmaq və ya təhlükəsizlik təbəqəsi əlavə etmək istəyirsinizsə, bu zaman idarə olunan modellər (managed switch) işə yarayır. Onlar xüsusilə IT mütəxəssisləri və orta-böyük bizneslər üçün nəzərdə tutulub.
Müasir switch-lər təkcə port sayına görə fərqlənmir. Onlar müxtəlif sürətləri dəstəkləyə bilər: Fast Ethernet (100 Mbps), Gigabit Ethernet (1000 Mbps), 2.5G və ya 10G modellər var. Eyni zamanda, bəzi modellər PoE funksiyası ilə gəlir — yəni həm məlumatı, həm də elektrik enerjisini eyni kabel vasitəsilə ötürür. Bu, IP kameralar və telefonlar üçün ideal həlldir. Ayrıca, fanlı və fansız modellər mövcuddur — səssiz işləmə vacibdirsə, fansız modellər üstünlük təşkil edir.
Brend seçimi istifadə səviyyənizə və ehtiyaclarınıza uyğun olmalıdır. TP-Link və D-Link giriş və orta səviyyə üçün ideal seçimlər təqdim edir. Netgear və ASUS orta sinif istifadəçilər üçün balanslı seçimdir. Daha peşəkar yanaşma istəyirsinizsə, Mikrotik, Ubiquiti və Cisco kimi markalar daha çevik idarəetmə və yüksək performans təklif edir. Bəziləri mobil tətbiq və ya veb interfeys ilə də idarə oluna bilir.
